Shefi i Grupit Parlamentar të VV’së, Rexhep Selimi, ka bërë të ditur se i është ngritur një aktakuze nga Gjykata Speciale.
Pas marrjes në Hagë në kuadër të aktakuzës për krime lufte nga Gjykata Speciale, të ish-kryeparlamentarit Jakup Krasniqi, është konfirmuar aktakuza edhe për ish-komandantin e UÇK-së dhe deputetin e Vetëvendosjes, Rexhep Selimin.
Lajmin e ka dhënë vet deputeti Selimi, nëpërmjet një postimi në rrjetin social Facebook.
Në postim shefi i Grupit Parlamentar të Vetëvendosjes, Rexhep Selimi, ka bërë me dije se i është ngritur një aktakuzë për krime lufte gjatë luftës së Kosovës, nga Gjykata Speciale.
Postimi i plotë:
“Të nderuar miq, bashkëluftëtarë, qyterarë e bashkëkombas të mi! Sonte në orët e mbrëmjes jam njoftuar nga Dhomat e Specializuara se ka një aktakuzë të konfirmuar për mua. Prandaj, po e ndjej për obligim t’ju njoftoj se nesër do të udhëtoj për Hagë (Holandë) që të përballem me këtë sfidë që i është vënë Ushtrisë Çlirimtare të Kosovës, para së gjithash.
Unë po shkoj me kokën lart dhe kurdo që kthehem do kthehem po ashtu me kokën lart sepse isha, jam dhe do të jem ushtar i Ushtrisë Çlirimtare të Kosovës për të cilën jam i gatshëm të jap gjithçka nga vetja ime. Ideali i asaj ushtrie të lavdishme është mbi mua, mbi këdo, mbi gjithçka.
Mirë u takofshim në fitoren e Ushtrisë Çlitimtare të Kosovës! Kam ditur e do të di gjithmonë ta mbroj lirinë e popullit, shtetin e Kosovës dhe UÇK-në e lavdishme”, .”, ka shkruar Selimi në rrjetin social Facebook./GazetaReforma.com/
