Gjykata e Posaçme ka shpallur të pafajshëm deputetin dhe kryetarin e Partisë Mundësia, Agron Shehaj, për veprën penale të shpifjes, në procesin gjyqësor të ngritur pas padisë së depozituar nga kreu i partisë “Shqipëria Bëhet”, Adriatik Lapaj.
Sipas vendimit të dhënë nga Gjykata e Posaçme Kundër Korrupsionit dhe Krimit të Organizuar, deklaratat publike të Shehajt, ku ai kishte akuzuar Lapajn për përfitime financiare nga krimi i organizuar, nuk përmbushin elementët e veprës penale të shpifjes. Për këtë arsye, kjo pjesë e padisë është rrëzuar.
Ndërkohë, gjykata e ka shpallur Shehajn fajtor për veprën penale të fyerjes, duke e dënuar me gjobë në vlerën e 300 mijë lekëve, që korrespondon me 3 milionë lekë sipas vlerësimit të vjetër monetar. Vendimi është dhënë nga gjyqtari Erjon Çela.
Në arsyetimin e vendimit, gjykata thekson se deklaratat e deputetit, ndonëse nuk përbëjnë shpifje penale, janë konsideruar si fyerje ndaj figurës dhe reputacionit të Adriatik Lapajt.
Çështja lidhet me akuzat e bëra publikisht nga Shehaj, sipas të cilave Lapaj kishte marrë 45 milionë lekë nga kompania “Merkaj 3 shpk”, e sekuestruar nga SPAK pasi dyshohej se përdorej për pastrimin e parave të grupit kriminal të njohur si “Çopjat”. Lapaj i ka mohuar akuzat, duke deklaruar se bëhej fjalë për detyrime financiare për shërbime ligjore si avokat dhe jo për përfitime të paligjshme.
Shehaj ka vijuar më pas akuzat, duke publikuar edhe dokumente, përmes të cilave ka pretenduar se Lapaj kishte marrë përsipër regjistrimin e një prone me vlerë miliona euro në bregdet, të blerë nga kompania e lidhur me grupin në fjalë. Sipas Shehajt, vendimi për këtë pronë ishte dhënë nga vjehrri i Lapajt, Alltun Çela, në kohën kur ai mbante detyrën e kryetarit të Gjykatës së Sarandës.
Mbetet për t’u parë nëse palët do ta ankimojnë vendimin në Apelin e GJKKO-së.
