Gjykata Kushtetuese ka pezeulluar gjykimin për zgjedhjet lokale të 30 qershorit lidhur me padinë e kryebashkiakes së Shkodrës, Voltana Ademi. Gjykata do i drejtohet tashmë Komisionit të Venecias për t’i kërkuar opinionin.
Gjykimi nisi ditën e sotme për këtë çështje dhe fillimisht Gjykata Kushtetuese rrëzoi pezullimin e gjykimit apo të çështje. Tashmë pritet verdikti i Komisionit të Venecias lidhur me zgjedhjet e 30 qershorit.
Lidhur me vendimin e Gjykatës Kushtetuese ka reaguar edhe kryetarja e Bashkisë Shkodër, Voltana Ademi, e cila ka ngirtur padi.
Ajo falenderon trupën e GjK për përkushtimin në mbrojtje të parimeve Kushtetuese. Ademi shprehet se ka bindjen se Gjykata Kushtetuese do të vendosë për rikthimin e pluralizmit politik në nivel vendor.
Reagimi i plotë:
Në Gjykatën Kushtetuese sapo ka përfunduar seanca plenare për shqyrtimin e kerkesës së Shoqatës së Bashkive të Shqipërisë lidhur me “zgjedhjet” e 30 qershor 2019.
Së pari, dua të falenderoj të gjitha mediat që më kanë ndjekur në këtë betejë për demokracinë dhe pluralizmin vendor.
Së dyti, falenderimi shkon për trupën e Gjykatës Kushtetuese, për kohën dhe përkushtimin e tyre në mbrojtje të parimeve kushtetuese dhe të drejtave të njeriut.
Ky proces ka rëndësi madhore për themelet e demokracisë dhe pluralizmit dhe shpresojmë që gjykata të kontribuojë, përmes shqyrtimit të kërkesës sonë, në rregullimin e këtyre themeleve që janë tronditur nga “zgjedhjet” e 30 qershorit dhe mos të përsëriten më të tilla raste.
Jemi krenarë nga ana tjetër, pasi është një arritje me vete që ky proces u konceptua dhe u nis nga Shoqata e Bashkive të Shqipërisë, si pjesë e shoqërisë civile që ndërhyn për të bllokuar veprime arbitrare të politikës.
Kam bindjen që pluralizmin nuk do ta asgjësojë asnjë autokraci dhe se Gjykata Kushtetuese do të vendosë kthimin në jetë të pluralizmit politik në nivel vendor dhe për rrjedhojë edhe të demokracisë vendore.
Kam bindje që GJK do të japë drejtësi për të drejtat e qytetarëve, drejtësi kushtetuese, drejtësi për pluralizëm, drejtësi për shtet dhe pushtet pluralist, drejtësi për çdo institucion aktor dhe faktor që kanë detyrim të zbatojnë Kushtetutën dhe vetëm Kushtetutën.
