Në mbledhjen e Komisionit të Ekonomisë, deputetja demokrate Jorida Tabaku është ndalur tek plani për ndërtimin e Teatrit Kombëtar, duke theksuar se prona i ka kaluar Ministrisë së Kulturës me vendim të Gjykatës Kushtetuese. Tabaku ka pyetur pse po i kalojnë 900 milionë lekë Bashkisë, kur prishja e tij është cilësuar ilegjitime.
“Gjykata Kushtetuese ka marrë një vendim për Teatrin Kombëtar, prishja është ilegjtime, prona i ka kaluar Ministrisë së Kulturës. Për çfarë arsye i kaloni Bashkisë Tiranë 900 mln lekë për Teatrin Kombëtar kur vendimi për prishjen është antikushtetues dhe prona i ka kaluar Ministrisë së Kulturës?!”, tha Tabaku.
Ajo tha se ishte dakord edhe me dekretin e presidentit Meta për Aktin Normativ, ndërsa vuri në dukje se Akti Normativ i qershorit 2021 nuk ka lidhje me stimulin ekonomik. Tabaku tha se një mbledhje për pandeminë dhe rindërtimin mund të bëhet në çdo kohë, por për këto çështje nuk ka një akt normativ.
“Nuk e kuptoj çfarë stimuli ekonomik do të japin për ekonominë 1 mld lekë për AKSHI apo 1 mld lekë për dronët që blihen nga Turqia. Ne mund të mblidhemi kur të doni për pandeminë dhe rindërtimin por nuk kemi një AN për këto çështje por për disa çështje”, deklaroi Tabaku.
