Gjykata e Posaçme ka shtyrë vendimin për kryebashkiakun e Tropojës, Rexhë Byberi, për të përcaktuar nëse çështja e tij do të kalojë në gjykim. Seanca e radhës është caktuar për datën 15 prill.
Mbrojtja e Byberit ka argumentuar se hetimet janë të paplota dhe ka kërkuar që çështja të kthehet për hetime shtesë, duke theksuar se në bazë të materialeve të dorëzuara në gjykatë nuk provohet vepra penale.
Në seancën e ardhshme, Gjykata do të vendosë mes tre opsioneve: kalimin e çështjes për gjykim, pushimin e saj ose kthimin për plotësim aktesh.
Rexhë Byberi, i cili ndodhet në masën “arrest në shtëpi”, dhe zëvendësi i tij, Abedin Kërrnaja, akuzohen për shpërdorim detyre, me një dëm financiar që tejkalon 277 milionë lekë.
Sipas SPAK, gjatë ndërtimit të dy rrugëve, ata kanë shkatërruar sipërfaqe pyjore pa marrë miratimet e nevojshme nga institucionet përkatëse të mjedisit.
Hetimet tregojnë se nuk janë ndjekur procedurat ligjore të kërkuara, përfshirë aplikimin në sistemin elektronik e-Leje, verifikimin e dokumentacionit dhe konsultimin me institucionet për vlerësimin e ndikimit mjedisor.
SPAK pretendon se ky model veprimi është përsëritur disa herë, duke rezultuar në shkelje të ligjit dhe dëme të konsiderueshme financiare. Për këtë arsye, ish-zyrtarët vendorë po përballen me akuzën e “Shpërdorimit të detyrës” në bashkëpunim.
