Gjykata e Lartë e Shqipërisë ka rrëzuar këtë të premte rekursin e paraqitur nga Erion Veliaj, duke lënë në fuqi vendimin e mëparshëm për masën e sigurisë “arrest me burg”.
Veliaj kishte pretenduar për shkelje proceduriale gjatë hetimeve të kryera nga Struktura e Posaçme Kundër Korrupsionit dhe Krimit të Organizuar dhe kishte kërkuar rrëzimin e vendimit të Apelit të Gjykata e Posaçme kundër Korrupsionit dhe Krimit të Organizuar, si dhe ndryshimin e masës së sigurisë.
Në njoftimin zyrtar, Gjykata e Lartë bën me dije se trupa gjykuese vendosi: “Mospranimin e rekurseve të paraqitura nga Erion Veliaj kundër vendimit 228(87-2025-359) datë 20.10.2025, të Gjykatës së Posaçme të Apelit për Korrupsionin dhe Krimin e Organizuar.”
Veliaj u arrestua më 10 shkurt, nën akuzën për dy vepra penale: “korrupsion pasiv” në 9 raste dhe “pastrim parash”. Dy ditë më pas, Gjykata e Posaçme konfirmoi masën e “arrestit me burg” ndaj tij.
Ndërkohë, për bashkëshorten e tij, Ajola Xoxa, u caktua masa e sigurisë “detyrim paraqitje” dhe “ndalim i daljes jashtë vendit”.
Sipas SPAK, ndaj Veliajt janë ngritur 13 akuza të ndryshme, përfshirë korrupsion pasiv, pastrim parash, mosdeklarim pasurie, keqpërdorim detyre dhe futje të sendeve të ndaluara në burg. Vendimi i Gjykatës së Lartë mbyll një tjetër përpjekje të kryebashkiakut për të ndryshuar masën e sigurisë, ndërsa hetimet ndaj tij vijojnë.
