Pas masës së sigurisë “arrest me burg”, mjeku i QSUT Edvin Prifti përmes avokatit të tij ka kërkuar ankimimin e vendimit të GJKKO.
Në ankimim thuhej se vendimi i gjykatës ndaj Priftit është i pambështetur në prova. Veç heqjes së masës së sigurisë, Prifti kërkon dhe kthimin e parave të sekuestruara, pasi sipas mjekut nuk janë sende që lidhen me veprat penale për të cilat po hetohet.
Kujtojmë se mjeku Prifti u vu në pranga pas përgjimeve ku sekretarja e Gjykatës së Krujës, deklaronte se do ti jepte një shumë eurosh, në mënyrë që ti bënte operacion pa radhë nënën e saj në ambientet e QSUT.
Pas kontrolleve atij iu gjet një shumë e madhe parash në banesë dhe në zyrë, çka i shtoi dhe akuzën e pastrimit të parave, ku më pas GJKKO vendosi dhe masën e arrestit ndaj tij.
Vetë Prifti tha se e priste një vendim të tillë, pasi sipas tij ishte kryeministri Edi Rama ai që njoftoi arrestimin, shumë më para se të shprehej vetë Gjykata.
“Deklaratat e kryeministrit duhet t’i komentojë i gjithë publiku. Në rast se nuk ka qenë në dijeni, por thjesht është lapsus, gjë që do dëshiroja ta besoja, pasi mendoj se mund të ketë qenë lapsus, në të kundërt mund të ketë një urdhër që ai iu ka dhënë prokurorisë dhe drejtësisë shqiptare. Nuk di ta them nëse është presion, urdhër apo lapsus, por kjo gjë do të vërtetohet tani, sapo të hyj në gjykatë.”, u shpreh mjeku.
Po ashtu, mësohet se në SPAK kanë mbërritur edhe 3 denoncime të reja për mjekun, të cilat po hetohen.
