Gjykata e Posaçme Kundër Korrupsionit dhe Krimit të Organizuar ka shpallur këtë të martë dënimin për Alqi Bllakon, ish-sekretarin e përgjithshëm të Ministrisë së Mjedisit, me 4 vite burg për korrupsion pasiv në lidhje me çështjen e inceneratorit të Tiranës.
Duke përfituar nga gjykimi i shkurtuar, dënimi i tij u reduktua në 2 vite e 8 muaj burg.
Prokuroria kishte kërkuar një dënim prej 5 vitesh e 4 muajsh, por pas gjykimit të shkurtuar, Bllako do të vuajë një dënim më të ulët.
Sipas SPAK, Bllako ka marrë 120 mijë euro nga kompania e biznesmenit Klodian Zoto për favorizimin e fabrikës së birrës së babait të tij.
Bllako është shpallur fajtor për dy raste korrupsioni pasiv. Në rastin e parë, ai mori rryshfet nga Zoto për ndihmën në favorizimin e dy pronarëve të inceneratorit të Tiranës. Në rastin e dytë, ai kërkoi një rryshfet prej 7.5 milionë lekësh për të favorizuar punësimin e Vladimir Bezhanit.
Ndërkohë, SPAK ka çuar për gjykim dhe pjesën tjetër të dosjes për inceneratorët, duke përfshirë ish-ministrin Lefter Koka dhe disa ish-zyrtarë të bashkisë së Tiranës.
