Detaje të reja kanë dalë nga hetimet për ngjarjen e rëndë të ndodhur në Laç, ku një konflikt mes disa të rinjve degjeneroi në përdorimin e armëve të zjarrit, duke lënë pas një viktimë dhe disa të plagosur.
Sipas burimeve nga grupi hetimor, ngjarja nisi pas një përplasjeje të rastësishme gjatë qarkullimit me makina, ku dy automjete dyshohet se prekën pasqyrat anësore. Kjo shkaktoi një debat verbal mes të rinjve, i cili më pas u përshkallëzua në dhunë me armë.
Klevis Ndreca, 28 vjeç, ishte në një automjet së bashku me Amarildo Ndojn, 26 vjeç, ndërsa në automjetin tjetër ndodheshin Daniel Gjeloshi, Liridon Ismailaj (të dy 26 vjeç) dhe Gerald Bitri, 24 vjeç. Palët ranë dakord të sqaroheshin pak më tutje në rrugën ku ndodhi edhe ngjarja.
Sapo kanë ndaluar mjetet dhe kanë zbritur nga to, Ndreca ka hapur zjarr me armë në drejtim të tre të rinjve në makinën tjetër. Nga të shtënat u plagosën rëndë Gerald Bitri, i cili humbi jetën më vonë në spital, si dhe Liridon Ismailaj dhe Daniel Gjeloshi. Nga breshëria e plumbave mbetën të plagosur aksidentalisht edhe shoku i Ndrecës, Amarildo Ndoj, dhe një shitëse ambulante që ndodhej pranë vendngjarjes.
Në përpjekje për t’u mbrojtur, Daniel Gjeloshi u kundërpërgjigj me armë zjarri, por fatmirësisht nuk plagosi asnjë person. Arma e tij u gjet nga policia pak metra larg vendit të ngjarjes dhe është sekuestruar si provë materiale.
Pas incidentit, Klevis Ndreca u vetëdorëzua në polici, duke dorëzuar edhe armën e krimit. Në dëshminë e dhënë, ai ka deklaruar se ka qëlluar për shkak se ishte trembur, pasi kishte parë që personat në makinën tjetër mbanin armë dhe kishte frikë se do e sulmonin.
Hetimet po vijojnë për të zbardhur plotësisht rrethanat e ngjarjes dhe për të përcaktuar përgjegjësitë ligjore të të përfshirëve.
