Duket se një ceremoni mortore ka bërë që COVID-19 të përparojë ndjeshëm në qytetin e Shkodrës.
Së fundmi, janë shtuar 4 raste të reja me COVID-19 dhe Dosja.al bën me dije se të infektuarit janë të moshave relativisht të reja dhe janë në gjendje të mirë shëndetësore.
Mësohet gjithashtu se dhe të prekurit e rinj janë nga lagja Kiras dhe Dobraç dhe janë të afërm me njëri-tjetrin.
Kështu, ka shkuar në 37 numri i të prekurve në këtë qark, duke u renditur i dyti më i prekur pas Tiranës, teksa mbrëmjen e djeshme është shënuar edhe viktima e parë nga Shkodra.
Ditën e djeshme, nga Shkodra janë nisur për në laboratorin e ISHP-së 17 tamponë dhe të gjithë të dyshuarit, nuk kanë pasur histori udhëtimi në zona të prekura por nuk kanë respektuar masat e distancimit social, pasi së fundmi kishin marrë pjesë në një ceremoni mortore
Deri tani, në Shqipëri janë 333 persona të infektuar dhe 20 viktima, teksa pritet përditësimi i të dhënave nga Ministria e Shëndetësisë.
Mosha mesatare e të prekurve është 50 vjeç, teksa në Spitalin Infektiv dhe atë “Shefqet Ndroqi”, janë shtruar 71 persona, 3 prej të cilëve janë në terapo intensive.
Numri total i të shëruarve në Shqipëri, ka shkuar në 100.
