Dy nga plazhet më të veçanta të Rivierës Shqiptare, Gjiri i Gramës dhe ai i Gjipesë, janë përfshirë në listën e 50 plazheve më të mira në Europë për vitin 2025, sipas platformës prestigjioze ndërkombëtare “The World’s 50 Best Beaches”.
Përzgjedhja është bërë nga një panel që përfshin rreth 1,000 ekspertë të turizmit, ambasadorë të njohur të plazheve dhe një juri ndërkombëtare të specializuar.
Gjiri i Gramës është pozicionuar në vendin e 12-të, ndërsa Gjipe zë vendin e 30-të, duke lënë pas plazhe të famshme në brigjet e Italisë, Francës, Spanjës apo Greqisë, destinacione që tradicionalisht kanë kryesuar listat e preferencave të turistëve ndërkombëtarë.
Kjo renditje vjetore bazohet në kritere që vlerësojnë autenticitetin, qetësinë, natyrën e paprekur dhe përvojën unike që një plazh ofron. Vëmendje e veçantë i kushtohet peizazhit të veçantë, largësisë nga zonat e mbipopulluara dhe lidhjes që ai krijon me natyrën.
Gjiri i Gramës, një nga thesaret natyrore të Jonit, njihet për ujin e kristaltë, ngjyrat e pasura dhe masivet shkëmbore që përqafojnë detin, duke krijuar një mjedis magjepsës dhe të izoluar.
Ndërkohë, Gjiri i Gjipesë është bërë simbol i ekoturizmit shqiptar, i pozicionuar në hyrje të një kanioni spektakolar dhe i aksesueshëm si nga deti ashtu edhe nga toka përmes shtegut malor. Bukuria natyrore thuajse e paprekur dhe përvoja e aventurës e bëjnë këtë plazh një pikë referimi për eksploruesit dhe turistët që kërkojnë përjetime autentike.
Përfshirja e këtyre dy gjireve në këtë klasifikim ndërkombëtar është një tjetër dëshmi se bregdeti shqiptar po konsolidohet si një destinacion mesdhetar elitar, me potencial të jashtëzakonshëm për zhvillimin e qëndrueshëm të turizmit natyror.
