Sapo ka përfunduar mbledhja Këshillit Politik që kishte nisur që prej orës 11:00 dhe në një deklaratë për shtyp përfaqësuesi i PS në këtë këshill Damian Gjiknuri tha se nëse opozita sjell një model të vendeve perëndimore, “jemi gati ta implementojmë.”
Gjiknuri tha se opozita duhet të gjejë një model të një vendi brenda hapësirës së OSBE/ ODIHR që ka edhe lista të hapura edhe sistem proporcional rajonal dhe ky model mund të implementohet direkt.
“Koalicionet rregullohen në kod, le të marrim një model. Ne jemi dakord, çdo vend i hapësirës së OSBE-së, që ka këtë sistem, le të zgjedhin formulën. Parlamenti nuk ka bërë asnjë gabim, e gjithë procedura është në rregull, edhe referuar shqetësimeve për frikën si ishte shkruar dispozita, do të thotë se parlamenti ka reflektuar, por hajde të gjejmë modelin. Fleta e votimit është problem teknik, këtu kemi problemin principal, koalicion sipas një modeli të vendeve të OSBE-së,tha Gjiknuri.
Më tej Gjiknuri tha se opozita jashtëparlamentare është duke e zvarritur këtë proces,pasi PD-ja ka si qëllim ta bllokojë dhe mos ta bëjë të mundur këtë arritje.
“Fatkeqësisht opozita jashtë parlamentit ndodhet në qëndrimet bllokuese për të bllokuar kushtetutën apo implementimin bazuar te 2-3 kërkesat e saj të natyrës politike. Amendimet kushtetuese, por edhe ata nuk japin asnjë argument, përtej kushtit që koalicionet të jenë sikur janë dhe asgjë tjetër. Por amendimet nuk pengojnë hapjen e listave 100% dhe as koalicionet parazgjedhore. PD-ja ka thjesht qëllimin e bllokimit për të mos e bërë të mundur këtë arritje,” u shpreh ai.
