Një nga gjyqtarët shqiptarë me probleme të shumta me pasurinë është Artan Gjermeni. Në vitin 2006 ai shpëtoi dy herë nga dy hetime.
Në vitin 2006 kallëzimi u bë nga ILDKPI. Kjo e fundit ngrinte dyshime për 70 milion lekë të vjetra që gjyqtari Gjermeni nuk i justifikonte dot. Hetimi asokohe u krye nga prokurori Sulejman Tola, i cili e pushoi çështjen. Edhe pse disa kohë më pas Prokurori i Përgjithshëm urdhëroi nisjen e hetimeve, çështja u pushua sërish.
Sipas Boldnews, i cili ka siguruar disa të dhëna, rezulton se Gjermeni është favorizuar nga Prokuroria e Kavajës, e cila urdhëroi më pas edhe pushimin e hetimeve ndaj tij.
Nga ana tjetër, rezulton se Gjermeni ka bërë deklarime të rreme përsa i përket një apartamenti në Tiranë, si dhe nuk ka bërë disa deklarime të tjera, për garazh apo kalçeto.
Rezulton se Gjermeni ka gënjyer në lidhje me të ardhurat e përfituara në Gjermani, duke deklaruar një shumë 4 herë më të madhe se realja.
Pas dy hetimeve të njëpasnjëshme rezulton se Prokuroria e Kavajës në vitin 2006 e shpëtoi Artan Gjermenin nga problemet e shumta me pasurinë.
Pas prokurorit Sulejman Tola, rastin e mori në dorë prokurorja e Kavajës Elsa Kareci, e cila edhe pse hetoi për disa muaj çështjen, i pushoi hetimet me argumentin se “fakti nuk ekziston si vepër penale”
Vendimet për pushimin e disa herëve të hetimeve, konstaton favorizimin që institucioni i akuzës i ka bërë Artan Gjermenit.
ILDKP ka konstatuar se Artan Gjermeni ka blerë një apartament 153 m2 pranë Ambasadës Amerikane në Tiranë, në vlerën 86.600 dollarë, e cila, me kursin e kohës, shkonte në vlerën e 11 milionë lekë të reja. Nga ana tjetër Gjermeni e ka shënuar në deklaratën e pasurisë në vlerën e 8.8 milionë lekëve të reja. Pra u konstatua nga ILDKP se gjyqtari Gjërmeni kishte deklaruar 3 milionë lekë të reja më lirë se sa e kishte blerë.
Po ashtu, ILDKP ka konstatuar se gjyqtari nuk ka deklaruar një garazh, në pallatin ku kishte blerë edhe apartamentin.
Pas shumë verifikimeve gjyqtari Gjermeni rezultonte se administronte një terren sportiv kalçeto dhe një lokal brenda tij, për të cilën deklaronte se zotëronte vetëm 20% por që në fakt e përdorte 100 % Për këto pasuri, Gjermeni deklaronte se i kishte krijuar nga të ardhurat e tij kryesisht si avokat dhe më tej si gjyqtar.
Si avokat Gjermeni kishte krijuar shumën e 1.2 milionë lekëve të reja. Ndërkohë ai pretendonte se kishte krijuar më shumë të ardhura, duke deklaruar shifrën 4.3 milionë lekë të reja.
Në hetimet e saj, Prokuroria e Kavajës rrëzoi në pjesën më të madhe gjetjet e Inspektoratit të Deklarimit të Pasurive.
