Anglia është skuadra e parafundit që kualifikohet në 8 më të mirat e Euro 2020. “Tre luanët” morën një fitore mjaft të rëndësishme në shtëpi duke thyer mallkimin e 55 viteve pa një fitore në fazën e eliminimit direkt edhe pse kanë arritur të kalojnë grupet.
Nga ana tjetër, Gjermania erdhi nga një fazë grupesh ku hasi shumë vështirësi. Ata u mundën nga Franca në ndeshjen e parë dhe i morën vetëm një barazim Hungarisë. E vetmja fitore që morën ishte përballë Portugalisë, duke u kualifikuar të dytët e grupit.
Pjesa e parë u mbyll në barazim pa gola, me anglezët që shpërdoruan disa mundësi. Në pjesën e dytë anglezët u rikthyen më të etur për fitore, teksa Rahim Sterling shënoi golin e parë për anglezët.
Jordan Pickford shpëtoi portën e “tre luanëve” në jo pak raste, ndërsa Thomas Muler shpërdoroi një mundësi të artë duke e dërguar topin jashtë.
Ishte kapiteni Harry Kane ai që shënoi golin e sigurisë, në një Europian ku paraqitjet e tij kanë qenë shumë larg pritshmërive. Ky ishte edhe goli i parë që ylli i Tottenham shënon në këtë turne.
Gjithçka ishte e mbyllur për gjermanët, të cilët tashmë do e shohin Europianin nga shtëpia.
Anglia do të mësojë kundërshtarin e saj nga ndeshja e mbrëmjes mes Suedisë dhe Ukrainës.
