Specialistja e Shëndetit Publik, Silva Bino dhe zv. Ministrja e Shëndetësisë, Mira Rakacolli, kanë dhënë detaje në lidhje me situatën e koronavirusit në vendin tonë dhe gjendjen e të infektuarve.
Bino theksoi se po testohen personat që paraqesin shenja të sëmundjes dhe jo çdo njeri që pretendon se është i infektuar.
Rakacolli ndërkohë bëri me dije se gjendja e pacientëve të parë të infektuar është përmirësuar ndjeshëm, shkruan “Balaknweb”.
Më tej ajo shtoi se të gjithë pacientët janë në gjendje të mirë dhe asnjëri nuk ka nevojë për trajtim intensiv.
Për personat e vetëkarantinuar, Bino tha se raportohen nga mjeku i familjes.
Disa nga të infektuarit që janë në shtëpi, thonë që askush nuk merret me ta. Si i kontrolloni? A i kontrollon njëri?
Silva Bino: Natyrisht, ata që janë të vetëkarantinuar apo sidomos të vetëizoluarit, sistemi shëndetësor merr kontakt me ta, nëpërmjet mjekut të familjes apo sistemit të shëndetit publik.
Cila është rregullorja e përdorimit të kiteve dhe a është e mundshme për çdokënd që testohet, çdo i dyshuar?
Silva Bino: Ne testojmë ato raste të cilat kanë nevojë të testohen dhe të cilat paraqesin shenja të sëmundjes. Jo çdo njeri që pretendon se është i infektuar, është i infektuar. Sëmundja ka një periudhë inkubacioni të caktuar kur virusi del. prandaj është e rëndësishme që të testojmë sipas rregullave të gjitha ato raste që ne duam të kemi rezultatin që nevojitet.
A keni kite? Sa kite dispononi?
Silva Bino: Ne kemi kitet e mjaftueshme në Institutin e Shëndetit Publik për të cilat mund të kryejmë testimin.
A mund të bëhen dhe në privat?
Silva Bino: Në dijeninë time nuk ka ndonjë laborator privat, i cili teston. Aktualisht kanë dalë shumë kite komerciale që po vlerësohen por pavarësisht këtyre, të gjitha testimet duhet të konfirmohen në laboratorin e virologjisë pranë ISHP.
Cila është mosha mesatare e të infektuarve me koronavirus?
Silva Bino: Në përgjithësi, në botë, mosha e cila kërkon kujdes shëndetësor, është mosha mbi 60 vjeç. Ndërsa mosha që kërkon kujdes intensiv, është mosha rreth 80 vjeç. Për këto pak raste që kemi ne, mosha e personave që kanë kërkuar kryesisht kujdes shëndetësor është 40 vjeç e lartë. Natyrisht mund të kemi pasur dhe ndonjë rast mes 20-30 vjeçëve por kanë qenë sporadike.
Si paraqitet gjendja shëndetësore e dy pacientëve të parë, ka ndonjë përmirësim?
Mira Rakacolli: Ne po monitorojmë me shumë kujdes gjendjen e pacientëve që janë të shtruar në spitalin infektiv. Më vjen mirë të them që gjendja shëndetësore e tre pacientëve të parë është përmirësuar ndjeshëm. Edhe pacientët e tjerë ndodhen në gjendje të qëndrueshme. Fatmirësisht nuk kemi asnjë rast që të kërkojë trajtim intensiv.
A lejon Ministria e Shëndetësisë që privati të kryejë analizën për koronavirusin?
Mira Rakacolli: Për MSH është shumë e rëndësishme që laboratori të jetë i certifikuar. Sot për sot i vetmi laborator i certifikuar nga OBSH është ai i ISHP-së.
Aktualisht në vendin tonë janë regjistruar 33 raste me koronavirus dhe një viktimë.
Qeveria ka ndërmarrë një sërë masash për të parandaluar përhapjen e koronavirusit.
Deri të dielën në mesnatë do të bllokohet qarkullimi i makinave private, ndërsa më herët kanë mbyllur shkollat, lokalet, fasoneritë dhe call center-at.
