Policia e Lezhës ka gjetur një tjetër automjet që dyshohet se është përdorur në vrasjen e Kreshnik dhe Gentjana Mujecit, ngjarje e rëndë e ndodhur më 26 prill 2026 në fshatin Balldren.
Gjatë kontrolleve të kryera mbrëmjen e së martës në fshatin Torovicë, në një rrugë dytësore pranë një kanali në tokë arë, është gjetur një automjet tip “Audi A4”. Sipas policisë, makina dyshohet se është përdorur nga persona të përfshirë në ngjarje si bashkëautorë dhe vëzhgues të lëvizjeve të viktimave.
Brenda automjetit janë gjetur edhe dokumente që dyshohet se u përkasin personave të shpallur në kërkim. Mjeti është sekuestruar si provë materiale dhe do t’i nënshtrohet ekspertizave kriminalistike për të përcaktuar rolin e tij në atentat.
Ndërkohë, policia vijon kontrollet në terren për lokalizimin dhe kapjen e autorëve të dyshuar, ndërsa materialet i janë referuar Prokurorisë së Lezhës për veprime të mëtejshme.
Vrasja dyshohet se ka ndodhur për motive hakmarrjeje. Renato Mhillaj është djali i Genc Mhillajt, ndërsa Adriano dhe Florin Mhillaj janë nipat e tij. Genc Mhillaj u vra në vitin 2016, ndërsa për këtë ngjarje u akuzuan Kreshnik Mujeci dhe kushëriri i tij, Jozef Mujeci. Në vitin 2018, Gjykata e Shkodrës e shpalli të pafajshëm Kreshnik Mujecin, me argumentin se “nuk provohej ta kishte kryer veprën penale për të cilën akuzohej”.
