Gara e njohur e çiklizmit, “Giro d’Italia”, do të nisë sezonin e ri në Shqipëri, duke u zhvilluar në tre etapa në Tiranë, Durrës dhe Vlorë.
Edicioni i 108-të i garës do të mbahet nga 9 deri më 21 maj 2025 dhe pritet me padurim nga të apasionuarit e këtij sporti.
Në total, gara do të përfshijë rreth 3 mijë pjesëmarrës, përfshirë garuesit dhe organizatorët, dhe pritet të shndërrohet në një mundësi të shkëlqyer për promovimin e Shqipërisë.
Ky eveniment do të ofrojë një mundësi të jashtëzakonshme për të treguar bukuritë natyrore dhe kulturën e vendit tonë në nivel global.
Negociatat për realizimin e këtij eventi zgjatën disa javë, por në fund arriti të mbyllet një marrëveshje që do të sjellë “Giro d’Italia” në Shqipëri për herë të parë.
Kryeministri Edi Rama ka shprehur kënaqësinë për këtë mundësi, duke theksuar se Shqipëria do të jetë në sytë e 800 milionë spektatorëve në mbarë botën, falë transmetimit të drejtpërdrejtë në 200 stacione televizive.
“Jam shumë i kënaqur që Shqipëria është zgjedhur për nisjen e madhe të vitit 2025. Edhe pse shumë vende konkurrojnë për këtë mundësi, jemi krenarë që arritëm të fitojmë besimin e organizatorëve të ‘Giro d’Italia’, një event që do të shohin 800 milionë spektatorë,” tha Rama.
