SPAK tashmë nuk ka asnjë pengesë për rastin “Gërdeci”, teksa mësohet se Gjykata e Lartë ka rrëzuar rekursin e Fatmir Mediut. Kujtojmë se ky i fundit, kërkoi prishje të vendimit të GJKKO për hapje të hetimit për dosjen në fjalë. Vendimi për rrëzimin e rekursit për ish-ministrin e mbrojtjes, është marrë në dhomën e këshillimit, me relatore Albana Boksin si dhe me gjyqtarët Ilir Panda dhe Sokol Binaj.
Vlen të theksohet se dorëzimi i rekursit nga ana e Fatmir Mediut, u bë në 1 Nëntor. Mediu kundërshtonte vendimin e Apelit të GJKKO që i hapi rrugë rihetimit dhe gjykimit të tij. Ndërkohë avokati Ardian Visha, ka deklaruar se vendimi i marrë është antikushtetues.
Sipas Vishës, vendimi cënon parimin e çështjes së gjykuar, pasi kërkesa për rigjykim është rrëzuar nga Gjykata e Tiranës. SPAK ka nisur të marrë dëshmitë e dëshmitarëve të dosjes “Gërdeci”, tragjedisë që u regjistrua më 15 mars 2008. Bëhet me dije se zyrtari i parë që do të merret në pyetje do të jetë ish-ministri Mbrojtjes Fatmir Mediu.
Gjithashtu në pyetje do të merren edhe familjarët, konkretisht, Zamira Durda e cila kërkon që hetimet në Gërdec të behën edhe për korrupsion. Në një deklaratë të dhënë në muajin shtator të këtij viti, Mediu ka thënë se rigjykimi i tij nuk sjell asnjë dobi, ndërsa theksoi se faktet janë të pakundërshtueshme dhe tregojnë se ai nuk ka asnjë lidhje me atë ngjarje.
