Gazetarja Klodiana Lala, e ftuar në rubrikën Opinion në News 24, ka zbuluar detaje të rëndësishme nga megaoperacioni i SPAK, gjatë të cilit u lëshuan 50 urdhër-arreste. Lala theksoi se këto masa sigurie lidhen me ngjarje kriminale të së kaluarës, duke përfshirë vrasjen e Bardhok Pllanajt në Shkodër dhe atentatet ndaj njerëzve të afërt të Ervis Martinajt.
Sipas Lalës, ndër të arrestuarit janë Leonard dhe Elvis Duka, të cilët ishin armiq të betuar të Ervis Martinajt. Gjithashtu, Arben Ndoka është shpallur në kërkim dhe mendohet të jetë aktualisht në Dubai, pas dyshimeve për përfshirje në krime për të marrë hakun e të vëllait të vrarë.
Operacioni përfshin kontrolle në disa qytete të Shqipërisë, përfshirë Tiranën, Vlorën, Lezhën, Fushë-Krujën, Nikëlin dhe Kurbini. Në këtë kuadër, është arrestuar edhe biznesmeni i njohur nga Velipoja, Mir Bruli, i cili u prangos në mëngjesin e sotëm nga forcat e shumta policore. Bruli, i dyshuar për veprimtari kriminale, është një i afërm i biznesmenit Pëllumb Gjoka, i arrestuar më parë si pjesë e dosjes “Metamorfoza”.
Nga 50 urdhër-arrestet e lëshuara, deri tani janë ekzekutuar 8, përfshirë disa arrestime brenda qelive të burgut. Forcat e policisë vendore të Shkodrës kanë ndihmuar në finalizimin e operacionit nën drejtimin e SPAK.
