Gazetari Eni Ferhati ka zbuluar detaje nga një megaoperacion të SPAK, ku janë arrestuar 10 persona, përfshirë 7 shqiptarë dhe 3 shtetas latinë (1 kolumbian dhe 2 venezuelas), të cilët ishin pjesë e një rrjeti ndërkombëtar të trafikut të kokainës.
Sipas Ferhatit, të arrestuarit shqiptarë ishin financues dhe organizatorë të operacionit, ndërsa shtetasit latinë kishin rol në ekstraktimin e drogës nga lëkura e kriposur e kafshëve.
Ngarkesat me lëkura bagëtish janë nisur nga një vend i Amerikës Latine, kanë kaluar përmes porteve italiane dhe mbërritur në Shqipëri, ku dyshohet se kokaina e pastër ishte fshehur në to për t’u përpunuar më tej në vend.
SPAK ka pasur dijeni për trafikun që nga fillimi, duke e lënë qëllimisht ngarkesën të kalonte për të monitoruar shkarkimet dhe ndihmuar në kapjen e grupeve të tjera të përfshira.
Hetimet vazhdojnë dhe po shqyrtohen persona të tjerë të dyshuar për organizimin e trafikut dhe përfshirjen e kompanive që mund të jenë përdorur për këtë aktivitet kriminal.
