Ditën e djeshme kryeministri Edi Rama deklaroi se Shqipëria ishte e gatshme që t’i ofronte Kosovës vaksina për mjekët dhe t’i priste ata të merrnin dozat në Kukës. Këto deklarata u bënë kur Rama priti dozat e para të vaksinës AstraZeneca që erdhën në vendin tonë.
“Nesër nis vaksiinimi për mësuesit. Edhe 60 mijë doza do mbërrijnë në muajin prill. Ideja është që të kemi vaksinim intensiv. Jemi gati, nga nesër që të organizohemi, bashkë me Kosovën, që t’ju japim mundësi mjekëve dhe infermierëve të spitaleve Covid, që nga spitali i Prishtinës. I presim vëllazërisht, ku do marrin dozat në Kukës”, tha Rama.
Por nuk ka vonuar përgjigja edhe nga pala kosovare dhe siç duket propozimi i Ramës nuk ka gjetur vend as për t’u marrë në konsideratë. Ministri i Shëndetësisë në Kosovë, Armend Zemaj ka komentuar deklaratën e Ramës, duke thënë se Kosova ka planin e saj të vaksinimit, prioritet i të cilit janë bluzat e bardha.
“Prioritet është vaksinimi i kuadrit shëndetësor, kur dihet përkushtimi i tyre dhe vdekja e mjekëve dhe infermierëve duke trajtuar virusin. Ne kemi plan të hartuar si do të zhvillohet vaksinimi, prioritet janë kuadri shëndetësor”, ka thënë Zemaj.
Deklarata e Ramës erdhi pasi kryeministri në detyrë i Kosovës, Avdullah Hoti kishte njoftuar se në vend do të mbërrinin dozat e para të vaksinës për disa javë. Sikur të kishte vaksinuar gjithë qytetarët në Shqipëri, Rama i ofron doza edhe Kosovës për të bërë një figurë sa më atdhetare pikërisht para zgjedhjeve.
