Studentët shqiptarë në Shkup do të dalin sërish në protestë më 18 maj, për të kërkuar të drejtën që provimi i jurisprudencës të zhvillohet në gjuhën shqipe. Protesta vjen pas reagimeve të shumta lidhur me çështjen e përdorimit të gjuhës shqipe në institucionet arsimore.
Mbështetje publike për protestën ka dhënë edhe ish-kapiteni i Kombëtares shqiptare, Lorik Cana, i cili u ka bërë thirrje qytetarëve që t’i bashkohen reagimit të studentëve.
“Gjuha është një nga shtyllat e Identitetit; kur ajo mohohet, mohohen të gjitha të drejtat për barazi, zhvillim dhe përkatësi! Ne nuk pretendojmë asgjë më shumë sesa atë që kemi fituar nëpërmjet sakrificës së paraardhësve tanë dhe të drejtës sonë të studiojmë në gjuhën tonë etnike, autoktone dhe shtetformuese. Bashkohu dhe ti”, shkruan Cana.
Reagimi i tij është shpërndarë gjerësisht në rrjetet sociale, ndërsa protesta e paralajmëruar në Shkup pritet të mbledhë studentë dhe qytetarë që kërkojnë respektimin e të drejtave të shqiptarëve për arsimim në gjuhën amtare.
