Agjencia Shtetërore e Prokurimeve të Përqëndruara ka zhvilluar garën për tenderin e ushqimit për pacientët në QSUT, ku është paraqitur vetëm një ofertë, ajo e kompanisë KPL shpk, e cila ishte sa 98 për qind e fondit limit.
Sipas dokumentave të publikuar në faqen e Agjencisë së Prokurimeve publike, fondi limit i tenderit për shërbimin e gatimit dhe shpërndarjes së ushqimit në QSUT ishte përcaktuar 1 miliardë e 122 milionë lekë.
Kompania e vetme në këtë garë KPL ka dhënë ofertën me 1 miliardë e 100 milionë lekë ose 22 milionë lekë më pak se fondi limit. Sigurisht kompania është shpallur fituese duke firmosur një kontratë me vlerën e 10.6 milionë euro për shërbimin 4 vjeçar të ushqimit në Qendrën Spitalore Nënë Tereza.
Edhe këtë herë, një kontyratë kaq e madhe dhe e rëndësishme përfundon në një proces pa garë dhe pa një transparencë për të gjithë qytetarët shqiptar.
Kujtojmë se edhe më parë ASHPP ka tentuar të hapë garën për këtë tender, në mars të vitit të kaluar me fond limit gati dy herë më të ulët ose 696 milionë lekë.
Por procedura dështoi, pasi në garë nuk u paraqit asnjë ofertë e përshtatshme. Pas dështimit të procedurës së parë, ASHPP e rishpalli tenderi, por kërtë herë me fond 1.12 miliardë lekë.
Tregu i furnizimit të institucioneve publike me ushqime dominohet nga një grusht kompanish të lidhura drejtëpërdrejtë me njerëz të pushtetshëm.
Nga monitorimi shumëvjeçar i kontratave rezulton se pothuajse çdo vit janë të njëjtat kompani të cilat fitojnë këto prokurime në Agjencinë e Blerjeve të Përqendruara.
Dokumentet zyrtare tregojnë se pjesën më të madhe të fondeve e kapi në vitin 2019 kompania “KPL” për kontratën e fituar për shërbimin e furnizimit me ushqime të Qendrës Spitalore “Nënë Tereza”.
“KPL” në të shkuarën rezulton në pronësi të Alma Tafanit, administratore dhe pronare e një tjetër kompanie të rëndësishme në këtë treg, Sori-Al. Përmes disa kontratave qiraje por edhe adresës së selisë qendrorë që “KPL” ka përdorur disa kohë, duket se lidhjet me firmën Sori-Al kanë vijuar edhe pas shitjes së aksioneve.
Sori-Al dhe KPL rrjedhin nga e njëjta origjinë. Më parë ato kanë qenë të dyja nën pronësinë e kryetarit të Dhomës së Tregtisë, Nikolin Jaka, ndërsa tani zotërohen respektivisht, e para nga ish bashkëshortja e tij Alma Tafani.
Këto kompani ndajnë çdo vit buxhetin e majmë të ushqimeve për spitalet, burgjet dhe institucionet e tjera publike.
