Gjykata për Krime të Rënda caktoi sot masën e sigurisë “arrest në burg” pa afat për Alket Arapajn, gardistin që disa ditë më parë dyshohet se vrau bashkëshorten e tij.
Në gjykatë ai dukej I qetë dhe i ftohtë, por gjendjen e tij më shumë e tregonte qëndrimi i trupi dhe duart e mbledhura grusht. Alket Arapaj, 44 vjeç dukej sikur kërkonte të fshihej poshtë xhupit të tij, i mbërthyer deri në grykë dhe i strukur në kafazin e xhamit përkrah një punonjësi të policisë.
Arapaj, ka dalë sot para Gjykatës së Krimeve te Rënda por mediat janë lejuar vetëm në nisje të seancës. Ka qenë Prokurori Besnik Muçi që ka kërkuar që seanca gjyqësore të zhvillohet me dyer të mbyllura. Pasi ka dëgjuar palët, gjykatësi ka vendosur të lërë në burg 44-vjeçarin.
Shkak për vrasjen dyshohet xhelozia, pasi Arapaj ka deklaruar se kishte dyshime se e shoqja takohej me persona të tjerë kur ai ishte në punë.
Edhe gjatë marrjes në pyetje Arapaj është shfaqur i paqëndrueshëm psikologjikisht.
