Garën për rindërtimin e stadiumit “Selman Stërmasi” e ka hapur Korporata Shqiptare e Investimeve (AIC), ku faza e parakualifikimit përfundon më 24 janar, ndërsa faza e kualifikimit do të zgjasë 60 ditë.
Vlerësimi i projekteve do të realizohet nga një juri ndërkombëtare, e cila do të shpallë 5 fitues për idenë më të mirë të projektimit. Nga këta, 3 fitues do të kalojnë në fazën finale të ankandit, ku do të shpallet një fitues i kontratës për rindërtimin e stadiumit.
Ky projekt do të mundësojë rijetësimin e stadiumit aktual, duke e transformuar atë në një stadium që i plotëson standardet e UEFA-s (kategorinë 4). Po ashtu, do të bëhet rikualifikimi i zonës përreth stadiumit, duke rikonceptuar hapësirat urbane për përdorim publik dhe privat.
Korporata Shqiptare e Investimeve (AIC) fton gjithashtu pronarët privatë të bashkohen me këtë iniciativë. Ftohen arkitektë, zhvillues dhe investitorë vendas dhe të huaj që të marrin pjesë në projektimin dhe zhvillimin e zonës urbane për stadiumin “Selman Stërmasi”.
