Dy ditët e fundit, dy raste aspak të këndshme janë shënuar në vendin tonë ku brenda vendeve të shenjta propagandohet politikë në prag të zgjedhjeve.
Bëhet fjalë për fushatën që kandidati i PS-së në Tepelenë, Tërmet Peçi zhvilloi në Kishën e Lekëlit dhe për intervistën e Majlinda Bufit që u zhvillua në ambientet e një kishe.
Kisha Ortodokse ka reaguar nëpërmjet një deklaratë për mediat, ku e ka cilësuar të papranueshme përdorimin e kishave për motive politike. Këto raste nuk duhet të përsëriten më dhe më tej në deklaratë thuhet se në asnjë vend nuk është marrë leje për atë që është bërë.
Deklarata e plotë
Përdorim i papranueshëm i mjediseve kishtare për qëllime politike
Ditët e fundit, në dy raste, në kuadrin e fushatës parazgjedhore, ka pasur përdorim të papranueshëm të mjediseve kishtare për qëllime politike. Në Kurjan të Roskovecit, në Mitropolinë e Fierit, është bërë një prezantim kandidati në mjediset e kishës monument kulture të Shën Nikollës dhe në fshatin Lekël të Tepelenës, në Mitropolinë e Gjirokastrës, ka pasur gjithashtu një takim politik parazgjedhor në mjediset e kishës së Profetit Ilia, të dyja pa dijeninë e Mitropolive përkatëse.
Përdorimi i ambienteve të brendshme të kishave të shenjta për aktivitetet politike në fushatat zgjedhore përbën një fyerje të ndjenjave fetare komunitare dhe institucionale. Çdo kishë orthodhokse, si objekt kulti i komunitetit orthodhoks, është vend i shenjtë adhurimi dhe lutjeje dhe nuk mund të përdoret në asnjë rast për qëllime politike.
Këto veprime janë në kundërshtim me “Marrëveshjen ndërmjet Këshillit të Ministrave të Republikës së Shqipërisë dhe Kishës Orthodhokse Autoqefale të Shqipërisë” (Ligji nr. 10 057, dt. 22.01.2009). Prandaj, kërkojmë që këto veprime të mos përsëriten dhe që për vendet e shenjta të tregohet respekti që imponon ligji dhe bashkëjetesa fetare.
Tiranë, 24 qershor, 2019
Zyra e Shtypit e Kryepiskopatës.
Një ditë më parë në lidhje me këto fushata reagoi gjithashtu edhe Mitropolia e Shenjtë dhe Kisha Ortodokse e Shqipërisë.
