Ambasada Amerikane në Shqipëri ka përshëndetur nisjen e fushatës elektorale, e cila filloi zyrtarisht ditën e djeshme. Me anë të një postimi në rrjetin social në “Twitter”, shkruhet se SHBA dhe të gjithë ndërkombëtarët e tjerë, do të bëjnë të gjitha përpjekjet e mundshme për të mbështetur procesin zgjedhor në Shqipëri.
“Sezoni i fushatës zgjedhore në Shqipëri nisi zyrtarisht dje për të ecur drejt zgjedhjeve kombëtare në 25 prill. Shtetet e Bashkuara mirëpresin fillimin zyrtar të fushatës dhe, së bashku me autoritetet vendore ndërkombëtarët, do të bëjnë të gjitha përpjekjet për të mbështetur zgjedhjet deri në përfundimin e tyre me sukses”, shkruhej në njoftimin e ambasadës.
Ditën e djeshme, më 25 mars, Partia Socialiste dhe ajo Demokratike, një në sheshin “Skënderbej” dhe tjetri para Universitetit Politeknik të Tiranës nisën fushatën. Kryeministri Edi Rama kërkoi një mandat të tretë, ndërsa kreu i PD-së, Lulzim Basha, premtoi rotacion për ndryshim në të mirë të vendit. Mitingjet e dy partive më të mëdha në vend, kishin një distancë kohore shumë të shkurtër, me PD-në që nisi në orën 17:30 dhe me PS-në që nisi në orën 18:00. Duket se lufta politike mes dy partive kundërshtare, ka nisur që në mitingjet e para dhe parashikohet shumë e ashpër në ditët në vazhdim.
"SHBA mirëpresin fillimin zyrtar të sezonit të fushatës dhe, së bashku me autoritetet lokale dhe palët ndërkombëtare, do të bëjnë të gjitha përpjekjet për të mbështetur zgjedhjet deri në përfundimin e tyre me sukses". Deklarata e plotë e Ambasadës së SHBA: https://t.co/mmsVs10aAU
— USEmbassyTirana (@USEmbassyTirana) March 26, 2021
