Ministri i Mbrojtjes së Kosovës, Armend Mehaj ka thënë se trupat e FSK janë nisur në mbështetje të vëllezërve dhe motrave në Shqipëri, për të ndihmuar në shuarjen e zjarreve.
Mehaj shkruan në një status në Facebook se vullneti i tij ka qenë për të ndihmuar Shqipërinë që prej fillimit të zjarreve. Ministri konfirmon se kontigjenti i FSK-së është nisur drejt Shqipërisë, pasi presidentja Vjosa Osmani dha autorizimin.
“Së bashku jemi më të fortë në kohë të vështira me vëllezërit e motrat tona!”, shkruan Mehaj.
Postimi i plotë:
I nisëm trupat tona të FSK-së në mbështetje të vëllezërve e motrave tona në Republikën e Shqipërisë.
Prej fillimit të shpërthimit të zjarreve, krahas operacioneve tona në vend, kam ofruar mbështetjen e plotë me kapacitetet tona në dispozicion për mbështetje të vëllezërve dhe motrave tona në Republikën e Shqipërisë.
Pas rëndimit të situatës, përveç në zonat jugore tani më edhe në ato veriore, dhe kërkesës së autoriteteve shqiptare për mbështetje, kam siguruar homologun tim, ministrin Peleshi, se vullneti im për zbarkim të kontingjentit të FSK-së në operacion për shuarjen e zjarreve, do të përkrahet fuqishëm nga Qeveria e Republikës më në krye kryeministrin Kurti dhe Presidenten e Republikës, Vjosa Osmani.
Kam dhënë direktivën për ngritjen e task-forcës së FSK-së dhe gatishmërinë e tij, dhe me dhënien e autorizimit zyrtar nga ana e Komandantes Supreme të Forcave të Armatosura, Presidentes Osmani, tani kontingjenti i FSK-së është nisur drejtë zonave të prekura për angazhim në operacion në kuadër të forcave reaguese të Republikës së Shqipërisë.
Së bashku jemi më të fortë në kohë të vështira me vëllezërit e motrat tona!
