Pak minuta më parë Komisioni i Pavarur i Kualifikimit, ka shkarkuar nga detyra prokurorin e Krimeve të Rënda Eugen Beçin pasi ka rezultuar me probleme në deklarimin e pasurisë.
15 minuta më vonë pas shkarkimit të Beçit, KPK ka shkarkuar nga detyra edhe gjyqtarin e Krimeve të Rënda, Luan Hasneziri.
Hasineziri është shkarkuar pasi i janë gjetur disa shkelje gjatë kontrollit të tre kritereve. Sipas relatimit të bërë nga KPK, gjyqtari i Krimeve të rënda rezultoi me probleme në kriterin e pasurisë dhe pastërtisë së figurës.
Edhe pse gjyqtari i ka mohuar të gjitha problemet e konstatuara nga KPK, përpjekjet e tij për t’u justifikuar kanë qenë të kota.
KPK këmbënguli se Hasneziri kishte probleme me pasurinë dhe nuk kishte deklaruar refuzimin e vizës amerikane që i ishte bërë disa vite më parë.
Nga hetimi i kryer, rezulton se gjyqtari ka deklaruar në mënyrë të pasaktë sa i takon burimit të krijimit të pasurisë së tij dhe se huat e marra te vëllai dhe një kushëri nuk justifikoheshin prej tyre.
Edhe nga analiza financiare e kryer, sipas Komisionit, gjyqtari rezultonte me bilanc negativ e për rrjedhojë nuk kishte mundësi për të vënë këtë pasuri.
Sa i përket pastërtisë së figurës, Drejtoria e Sigurimit të Informacionit të Klasifikuar e konsideroi të papërshtatshëm gjyqtarin, pasi sipas raportit, nuk kishte deklaruar refuzimin e vizës nga ambasada e Shteteve të Bashkuara të Amerikës.
Në një vendim të tretë të mërkurën, KPK konfirmoi në detyrë Regleta Panajotin, gjyqtare pranë Gjykatës së Tiranës.
