Ditën e djeshme gratë naftëtare të rafinerisë së Ballshit deklaruan se nuk do të heqin dorë nga greva e tyre pa marrë atë që u takon duke thënë se pas largimit të burrave në grevë do të vijnë fëmijët, por duket se gjërat kanë ndryshuar.
Për shkak të koronavirusit dhe rrezikut që ai sjell sindikata e naftëtareve ka marrë vendimin që të anulojë deklaratën e djeshme. Ashtu sikurse edhe dje lajmin sot e bëri të ditur nënkryetari i sindikatës
“Nuk do t’i sjellin fëmijët për momentin për shkak të frikës nga covid-19”.
Ndërsa një greviste u shpreh: “Ne e kemi menduar atë gjë, por kemi dëshirë që kauzën ta çojmë vetë, por nuk e dimë si do të na marrë rrjedha”.
Ndërkohë para pak çastesh gratë naftëtare njoftuan se nuk do ta ndërpresin grevën pasi kërkesa e kryeministrit Rama për të negociuar mbi këtë çështje është e pavend pasi nuk ka negociata për bukën e gojës pasi ato nuk po kërkojnë lëmosha por rrogën që iu takon.
“Kjo është papërgjegjshmëri e kryeministrit që thotë këtë, sepse në një shtet demokratik nuk e kuptoj sesi thotë negocio për bukën e gojës. Për cfarë? Kur ne e kemi thënë shumë qartë, për bukën e fëmijës nuk negociohet, sepse nuk e kërkojmë të na e falë të na japë lëmoshë, por djersën tonë. Kryeministri thotë hajde ta neogicojmë, cfarë është kjo papërgjegjësi e kryeministrit që thotë hajde negociojmë, ne duam lekët që kemi punuar.“
