Luçiano Boçi ishte i ftuar sot në Neës24, ku foli lidhur me masën e dhënë ndaj kreut demokrat, Sali Berisha dhe tubimin e djeshëm poshtë banesës së ish-kryeministrit.
Boçi akuzoi Edi Ramën se do që të përqajë opozitën dhe se po godet liderin Sali Berisha. Sa i përket masës së Berishës, tha se është një rast i paprecedentë, teksa shtoi se ky vendim i GJKKO-së po ngjall revoltë të madhe te qytetarët.
“Ka një frikë sigurisht nga ana e mazhorancës, e cila po godet kryetarin e opozitës. Është dëshmuar tashmë se është një frikë e brendshme e Ramës. Dihet fryma dhe shtysa që ai i ka dhënë SPAK-ut për zotin Berisha. Ne jemi këtu dhe nuk e dorëzojmë opozitën te Rama. Situata të tilla ku goditet kreu i opozitës ngjall revoltë dhe zemërim, dhe kjo duket qartë te qytetarët,” u shpreh ai.
Ndër të tjera, Boçi lajmëroi për një tjetër tubim sot, në orën 17:30.
