Partia Socialiste shpesh herë ka kritikuar kreun e Partisë Demokratike për shkeljen e masave anti-COVID, të vendosura nga Komiteti Teknik i Ekspertëve. Por një video e publikuar nga “JOQ Albania”, i nxjerr blof të rinjtë e PS-së. Një festë e “çmendur” me alkool, muzikë e kërcime, pa distancë dhe pa asnjë masë mbrojtëse shihet në video.
Udhëzimet për këtë “mega party” i jep kryetarja e FRESH në Librazhd, Brixhida Biçaku. Ndër të tjera Biçaku ka dhënë edhe urdhër që askush të mos filmojë dhe asgjë mos të bëhet publike. Në fund, Biçaku i uron të rinjve që të kënaqen dhe të bëjnë qejf.
“Do ju lutesha që nga ky aktivitet, të mos dalë asnjë foto dhe asnjë video. Ne jemi pjesë e një familje shumë të madhe, ajo është Partia Socialiste dhe duke respektuar situatën ku jemi, duhet që në këtë vende të mos hapen as video dhe as foto. Nuk e di, po çdo gjë tjetër që ka të bëjë me median, në mënyrë që në takimin e radhës, kur të vijë kryeministri të bëjmë një mega party tjetër. Dhe nëse ndonjë shoku juaj e zë pak birra dhe është duke filmuar, ti shoku që je në krah merrja telefonin. Kështu që bëfshi qejf”, dëgjohet të flasë Brixhilda Biçaku.
Kujtojmë se kryeministri Edi Rama ishte për vizitë në qytetin e Librazhdit dy ditë më parë, ku zhvilloi takimin me të rinjtë e kësaj zone.
