Dalin pamje të reja nga ngjarja famëkeqe te qendra tregtare “Casa Italia”, zjarri në të cilën i mori jetën 32-vjeçarit Arjan Sala, që ishte shefi i sigurisë në objekt. Në foton më poshtë, duket momenti kur Arjan Sala vrapon për të shpëtuar kolegët e tij. Me bombol zjarrfikëse në dorë, Sala është pikasur nga kamerat e sigurisë së qendrës tregtare “Casa Italia”, teksa vrapon për të hyrë në magazinën e përfshirë nga flakët.
Sala nuk shihet se mban ndonjë maskë të vendosur apo veshje speciale në mënyrë që të mos prekej nga zjarri. Sot, Sala është shpallur “Dëshmor i Atdheut”, dhe titulli po u jepet familjarëve të tij nga kryeministri Edi Rama. Arjan Sala ishte babai i një vajze të mitur dhe prej vitesh, ishte punonjës sigurimi.
Trupi i tij u gjet dje, tre ditë pas zjarrit që ra tek qendra tregtare ku ai punonte. Ekspertiza paraprake zbuloi se i riu ka qëndruar rreth 24 orë gjallë, por më pas nuk ia ka dalë të mbijetojë. Trupi i tij u nxor me vonesë, ndërsa një përplasje e familjarëve dhe forcave zjarrfikëse vuri nën presion autoritetet që të gjenin sa më herët trupin e Arjan Salës, një punëtori të zakonshëm që shpëtoi rreth 25 qytetarë dhe u vetësakrifikua në zjarrin masiv që ra te “Casa Italia”.
