Lumi Gjanica nuk është pastruar dhe kohët e fundit në të janë shtuar ndotja kimike që derdhet prej industrisë hidrokarbure në zonë.
Ky lum, shpesh herë emërtohet nga qytetarët e Fierit, si lumi shumë ngjyrësh. Shkak për këtë është ndryshimi i shpeshtë i ngjyrës si pasojë e ndotjes nga mbetjet hidrokarbure.
Mëngjesin e kësaj të diele, Gjanica kishte ngjyrë të bardhë të shoqëruar me erë të rëndë gazi.
Prita e ndërtuar në hyrje të qytetit, pas rehabilitimit të shtratit të lumit Gjanica, grumbullon vetëm mbeturinat e ngurta, por jo mbetjet e lëngëta të shkaktuara si pasojë e reaksioneve kimike.
Sipas specialistëve të naftës, në Gjanicë mund të jenë shkarkuar mbetjet e depozitave të dekantimit, që ndodhen në zonat naftëmbajtëse.
Pas procesit të dekantimit, këto mbetje derdhen pa kontroll në përrenj, duke kaluar në lumë me destinacion final bregdetin e Semanit.
Në të tilla kushte, ndotja është e shumëfishtë me dëme të mëdha ekologjike për të gjithë florën dhe faunën e zonës, por edhe për vet njerëzit që jetojnë në të dy brigjet e Gjanicës.
Shqetësimin e kanë nxjerrë në pah dhe shumë aktivistë dhe ambientalistë të zonës, të cilët kanë postuar në rrjetet sociale foto dhe video nga ndotja e madhe në këtë lumë.
Por siç thonë edhe ata vetë, Ministria e Mjedisit dhe e Turizmit, përgjegjëse direkte për këtë problem, nuk është bërë “e gjallë” në asnjë moment.
Por jo vetëm Ministria e drejtuar nga Blendi Klosi, por as zyrat mjedisore dhe specialistët e saj në Bashkinë Fier, nuk reagojnë për këtë ndotje.
Sistemi i shtratit në Gjanicës dhe prishja e ndërtimeve paleje anës tij, në qytetin e Fierit, tashmë e ka nxjerrë edhe më në pah si ndotjen e madhe të lumit ashtu dhe erën e rëndë të kimikateve me bazë hidrokarbure.
/GazetaReforma.com/
