Tre ditë më parë nga Rinasi u nisën 30 mjeke e infermierë shqiptarë, në ndihmë të kolegëve të tyre italianë, të cilët po luftojnë me koronavirusin.
Mjekët dhe infermierët u dërguan në kuadër të një marrëveshjeje mes kryeministrit Edi Rama dhe ministrit të Jashtëm italian, Luigi di Maio.
Gjesti i palës shqiptare bëri bujë në anën tjetër të Adriatikut, ku qeveria dhe shqiptarët morën falenderime të shumta nga politikanë, figura të shquara dhe njerëz të thjeshtë.
Ndërkohë një nga infermieret shqiptare, e quajtur Ornela, është shfaqur sot në faqen e parë të gazetës “La Repubblica”.
Ajo ndodhet në krah të kolegeve nga Italia, Afrika dhe Kolumbia.
Italia është vendi me numrin më të lartë të viktimave në botë nga koronavirusi, me plot 11.591.
Përtej numrit të lartë të viktimave, italia po përballet edhe me mungesën e mjekëve dhe shtretërve.
Gjithashtu kryeministri italian Giuseppe Conte i la afat 10 ditë Brukselit gjatë Samitit të javës së shkuar, për të gjetur një zgjidhje ekonomike për vendet e prekura.
