Ndezja e motorëve të fushatës elektorale për vitin 2021, ka vënë në lëvizje jo vetëm strukturat e qeverisë qendrore, por edhe ato lokale të cilat janë angazhuar në “përmbushjen e premtimeve” të mbetura….
Vetëm dy ditë më parë, “GazetaReforma.com” publikoi një lajm ku flitej për miliona euro fonde dhe tendera që qeveria u kishte akorduar ndër të tjera edhe bashkive, vetëm për muajin shtator.
Me miliona euro që kanë dalë nga thesari i shtetit janë dhënë për pagesat e punëve të realizuara, ose edhe për projekte që duhet të mbyllen brenda këtyre muajve nga ana e bashkive socialiste.
Por këto ditë, fotoja e një cope rruge të asfaltuar vetëm disa metra katrorë, është bërë simbol i memeve të shumta online.
Por për ironi, një foto e ngjashme u shpërnda sot nga Bashkia e Pogradecit.
Kjo e fundit e cila drejtohet nga kryebashkiaku socialist Ilir Xhakolli, i cili u prezantua në këtë detyrë nga ministri Eduart Shalsi, është krenuar në faqen e saj për një copëz urë druri të ndërtuar në një fshat malor të zonës, ku banorët prej vitesh ankohen se nuk kanë një rrugë dhe një urë që t’i lidh ata me qytetin.
Fotoja e cila tashmë ka bërë xhiron e rrjeteve sociale, është një “meme e gatshme” dhe nuk ka nevojë për shumë koment.
Ajo është ura “e re” Homçanit që lidh fshatin me lagjen “Proga” dhe shërben si rrugë kalimi për këmbësorët drejt Selcës së Sipërme dhe Hoshteçës, në Pogradec.
Këtë bashkia e Pogradecit e ka shitur për një “investim serioz” duke e reklamuar edhe në faqen zyrtare të saj në Facebook, por edhe duke pretenduar se e ka “rilindur” urën me dërrasa të fshatit.
Nuk bëhet fjalë për një rrugë apo urë në të cilën mbi të të kalojnë makina, por për një copë dërrasë ku mezi kalon edhe një gomar i ngarkuar.
/GazetaReforma.com/
