Atentati ndaj biznesmenit Eduart Reçi është një ngjarje tragjike që ka tronditur Tiranën.
Ngjarja e rëndë ka ndodhur mbrëmjen e së mërkurës, në afërsi të banesës së tij, pranë Fakultetit të Historisë dhe Filologjisë, në Rrugën e Elbasanit, në pjesën e jashtme të një pallati.
Sipas informacioneve të para, Reçi dyshohet se është qëlluar nga distanca me një pushkë, pasi kamerat e sigurisë në zonë nuk kanë regjistruar asnjë person që t’i afrohet viktimës.
Për momentin, familjarët e biznesmenit deklarojnë se ai nuk ka pasur konflikte të dukshme, duke shtuar misterin mbi motivet e mundshme të atentatit.
Grupi hetimor është angazhuar intensivisht për të sqaruar rrethanat e ngjarjes dhe për të identifikuar autorët.
Eduart Reçi, një biznesmen me origjinë nga Dibra, ishte një figurë e njohur në sektorin e ndërtimit, me disa projekte ndërtimi të suksesshme në kryeqytet. Ai ndërroi jetë në mëngjesin e kësaj të enjteje në spital, pas plagëve të marra nga plumbi në kokë, të cilat nuk i mbijetoi dot.
