Hekurudha Librazhd-Përrenjas, pjesë e segmentit kombëtar Elbasan-Librazhd-Përrenjas-Guri i Kuq (Pogradec), është shkatërruar edhe në një tjetër segment të saj prej ndërtimit të një hidrocentrali lokal.
Vitet e fundit babëzia njerëzore duket se nuk po njeh më kufi, duke shkatërruar kështu çdo pasuri natyrore, në shumë raste edhe me “bekimin” ose miratimin nën zë të të Agjencisë Kombëtare të Zonave të Mbrojtura.
“GazetaReforma.com” ka mësuar sot nga lexues8it e saj që kanë vënë në dispozicion edhe disa foto, se ndërtimi i një HEC-i privat, në krah të rrugës nacionale Përrenjas-Librazhd, ka shkatërruar jo vetëm pejsazhin natyror, por edhe linjën hekurudhore.
Sikurse shikohet në fotot më poshtë, ajo çfarë po ndodh është një masakër mjedisore, por duket se kompania private që është licencuar edhe nga Ministria e Mjedisit dhe Turizmit, ka futur “në thes” edhe drejtorin e AKZM-së, Zamir Dedejin.
Është detyra e këtij të fundit dhe institucionit të drejtuar prej tij, që nëpërmjet inspektorëve në terren të bënte të paktën sinjalizimin e autoriteteve më lartë, për masakrën mjedisore në zonë.
Për ndërtimin e këtij HEC-i, është shkatërruar jo vetëm lumi në zonë, por për më tepër gjithçka ka ndodhur në mes të ditës, në një kohë që autoritet kanë heshtur.
HEC-i lë pa ujë banorët e Pishkashit
Nga ndërtimi i “HEC-Pishkash” që ka kryer një masakër mjedisore në shtratin e lumit me të njëjtin emër, banorët e fshatit Pishkash në Përrenjas, kanë mbetur pa ujë të pijshëm.
Shkak për këtë, është bërë ndërtimi i HEC-eve që kanë filluar në mars të këtij viti, kur banorët ishin izoluar për shkak të pandemisë.
Ndërtimi i HEC-eve mbi hekurudhën Librazhd-Pogradec është licencuar nga Ministria e Mjedisit dhe ajo e Energjetikës, përkatësisht nga institucionet që drejtohen nga Blendi Klosi dhe Belinda Balluku.
Ndërkohë, disa kohë më parë një pjesë e banorëve të fshatit Pishkash u munduan të marrin kontakte me përfaqësuesit e firmës që po bën punimet, por nuk iu është dhënë përgjigje.
Nga shkatërrimi i këtij lumi, si dhe nga devijimi i tij, mbeten pa ujë për të vaditur tokat rreth 290 familje në zonën e Pishkashit në Përrenjas.
/GazetaReforma.com/
