Prokuroria e Tiranës ka marrë të pandehur dy mjekë gjinekologë të Maternitetit “Koço Gliozheni”, të identifikuar me inicialet E.V. dhe A.H., nën akuzën për “Neglizhencë në trajtimin mjekësor”. Vendimi vjen pas përfundimit të hetimeve mbi një rast tragjik ku një foshnjë e sapolindur humbi jetën si pasojë e neglizhencës së pretenduar gjatë procesit të lindjes.
Sipas njoftimit zyrtar, çështja është regjistruar pas kallëzimit të bërë nga nëna e fëmijës, shtetasja A.Z., e cila denoncoi humbjen e foshnjës së saj gjatë lindjes. Aktet e ekspertimit mjeko-ligjor kanë zbuluar se vdekja e të porsalindurit ka ardhur si pasojë e dëmtimeve të rënda gjatë lindjes, të shkaktuara nga përdorimi i forcepsit, një instrument mjekësor që zakonisht përdoret në raste të lindjeve të vështira.
Ekspertiza konstaton se këto dëmtime kanë çuar në një shok traumatik hemorragjik te foshnja, dhe se nuk bëhet fjalë për një komplikacion të paparashikueshëm, por për pasojë direkte të mungesës së ndërhyrjes në kohë nga ana e mjekëve. Sipas planit mjekësor paraprak, lindja ishte parashikuar të kryhej me ndërhyrje cezariane, çka sipas ekspertëve do të kishte shmangur nevojën për përdorimin e forcepsit.
“Prokuroria e Tiranës merr të pandehur 2 mjekë gjinekologë për ‘Neglizhencë në trajtimin mjekësor’, mosveprimi në kohë çoi në humbjen e jetës së të sapolindurës. Nga hetimet e kryera dhe aktet e ekspertimit rezulton se mosveprimi i të pandehurve, mjekes që u kujdes gjatë shtatzënisë dhe mjekut roje të gatshëm, në kundërshtim me detyrimet e tyre profesionale, ka qenë faktori vendimtar që çoi në zhvillimin e një procesi të rrezikshëm të lindjes, i cili përfundoi me humbjen tragjike të jetës së një fëmije të sapolindur”, thuhet në deklaratën e Prokurorisë pranë Gjykatës së Shkallës së Parë të Juridiksionit të Përgjithshëm, Tiranë.
Hetimet për këtë ngjarje janë mbyllur dhe çështja është referuar për ndjekje penale, në pritje të vendimit gjyqësor.
