Java e 35-të e Superiores u mbyll këtë fundjavë, dhe si zakonisht, pas përfundimit të ndeshjeve është përzgjedhur formacioni më i mirë nga trajnerët e ekipeve kombëtare.
Në portë spikat Angelo Tafas i Teutës, i cili ka dhënë një tjetër paraqitje të sigurt.
Mbrojtja përbëhet nga katër emra që kanë shkëlqyer në fushë: Agan Mjaki (Laçi), Artan Jazxhi (Teuta), Fabjan Përndreca (Bylis) dhe Andrey Yago (Vllaznia).
Në mesfushë, drejtimin e lojës e ka marrë Mamane Amadou Sabo (Skënderbeu), me Cristian Dros (Elbasani) dhe Arli Përgjoni (Bylis) që i japin dinamizëm dhe ekuilibër krahëve.
Në ofensivë, William Cordeiro (Laçi) dhe Arbin Zejnullai (Egnatia) kanë qenë të papërmbajtshëm në krahë, ndërsa në qendër të sulmit ka spikatur Amarildo Gjoni (Elbasani), që ka udhëhequr vijën e parë të sulmit.
Për paraqitjen e tij dhe mënyrën si menaxhoi ekipin, trajneri i Teutës, Bledar Hodo, është vlerësuar si trajneri më i mirë i javës.
