Bregdeti shqiptar vijon të mbetet zgjedhja e parë për shumë shqiptarë të Kosovës të cilët i qëndrojnë besnik edhe në muajin shtator.
Edhe këtë fundjavë si shumë të tjera gjatë verës radhët e gjata në pikën e kalimit kufitar të Morinës janë kilometrike për shkak të fluksit të madh të pushuesve që vijnë për në vendin tonë.
Mbi 15 mijë pushues kosovarë kanë hyrë në Shqipëri gjatë mëngjesit të sotëm, teksa po punohet me procedurë të përshpejtuar e me kapacitet të plotë me 6 sportele.
Nga të dhënat e Qëndrës së Menaxhmit Kufitar të Kosovës mësohet se mbi 123 mijë qytetarë të Kosovës kanë hyrë në Shqipëri përmes pikës kufitare Morinë, gjatë 11 ditëshit parë të këtij muaji. Ndërsa në një bilanc të muajit gusht, mbi 800 mijë qytetarë të Kosovës pushuan në Shqipëri.
Ndërkohë sipas të dhënave zyrtare nga policia kufitare e Kosovës, gjatë gushtit për në Shqipëri për pushime kanë dalë 810 mijë e 71 qytetarë të Kosovës.
