Vazhdon të jetë e përfshirë nga flakët magazina e Casa Italia ku prej 7 orësh ka mbetur i bllokuar Arjan Sala, i riu që ishte shefi i sigurisë e u fut në magazinë për të nxjerrë kolegët e vet. Xhaxhai i të riut ka folur për mediat duke thënë se situata nuk është akoma në kontroll dhe se nuk kanë pasur komunikim me familjarin e tyre. Ai ka treguar se 30-vjeçari është prind i një fëmije 2 vjeç, ndërsa ka bërë thirrje që përgjegjësit të zgjohen e të kontrollojnë
“Dëgjohen shpërthime, flakë, tym, situata nuk është nën kontroll akoma. Urojmë perëndinë, Zotin ta kemi në anën tonë dhe të dalë shëndoshë e mirë. Me djalin nuk kemi pasur komunikim, morëm vesh që ngeli brenda, nuk doli dot. E lajmëruan që ra zjarr, shkoi për të ndihmuar personat të dalin, por vetë nuk ka dalë. Edhe një qenie jo njerëzore po të jetë aty të dhimbset, jo një njeri 30-vjeç që e pret fëmija te shtëpia. Një djalë dyvjeçar e pret në shtëpi, cfarë do i themi nesër? Si do i themi nesër, që nuk e gjetëm ku është? Dua që shteti të ngrihet në këmbë dhe të mos flenë gjumë. Përgjegjësit të zgjohen nga gjumi. Nuk kemi arritur të futemi dhe të kontrollojmë të gjithë zonën, thonë zjarrfikësit. Zoti na ruajt. Arjani punonte prej shumë kohësh, ishte përgjegjës sigurie” tha ai.
Magazina u përfshi nga flakët pasditen e sotme teksa shkaku dyshohet të ketë qenë një shkëndijë elektrike. Forcat zjarrëfikëse ndodhen jashtë ndërtesës dhe janë duke hapur vrima në mur në mënyrë që të dalë tymi, por nuk ka ende asnjë shenjë nga roja që ka mbetur i bllokuar.
