Ndonëse ditën e sotme numri i rasteve të reja me Covid-19 ka rënë ndjeshëm, ai vijon të mbetet proekupues.
Lidhur me këtë çështje tepër shqetësuese ka folur së fundmi mjeku pneumolog Arjan Mezini, i cili ka deklaruar se ne tashmë duhet të ndërgjegjësohemi dhe të respektojmë protokollet për mbrojtjen nga Covid-19.
Në një intervistë për ABC News, Mezini ka theksuar se rritja e numrit të rasteve pas rihapjes ishte normale, por shqetësuese ishte fakti që numri më i madh i rasteve janë konstatuar tek institucionet publike dhe personeli mjekësor.
Sipas tij, kjo gjë lidhet me mungesën e testimeve.
“Përhapja e infeksionit në një mjedis spitalor ku ka dhe pacientë me sëmundje të tjera kronike është fatale për ta. Analiza për personelin mjekësor duhej të bëhej më shpesh, nëse ne nuk kemi kapacitete të bëjmë njëherë në 4 ditë të paktën ne duhet ta bëjmë një herë në dy javë. Tek spitali “Shefqet Ndroqi”, pacientët tamponohen, ne nuk e bëjmë këtë testim sigurie tek personeli por tek pacientët bëhet te të gjithë. Kjo mungesë është problem pasi fut infeksionin te spitale. Ne jemi koshient që kishim një izolim të zgjatur dhe njerëzit e mërzitën. Unë mendoj se pas datës 15 prill ne e tepruam me masat duke shkaktuar lodhje te njerëzit. Ajo që është e pakuptimtë është përhapja e infeksionit në institucionet publike dhe mjekësore që tregon se ne nuk kishim një përgatitje të saktë në lidhje me respektimin e masave mbrojtëse. Rritje të rasteve do të kishte patjetër pas rihapjes, por nuk mendoja se rritja e rasteve do të ishte në këto institucione.”
Ndër të tjera, mjeku ka komentuar dhe metodologjinë që po përdoret në vendin tonë për të llogaritur numrin e personave që humbin jetën nga Covid.
Sipas tij, viktimë e Covid-19, quhet çdo persona që rezulton pozitiv pavarësisht ka apo jo shenja.
“Viktimë Covidi nuk do të thotë se çfarë mendoj unë, por OBSH në protokollin e saj ka theksuar se vdekje nga Covid quhet çdo pacient që vdes dhe është i prekur nga SARS-COV 2, pavarësisht ka apo jo shenja, pasi Covid jep tromboza, jep infarkte etj. Këto janë pacientë me sëmundje kronike dhe me histori të gjatë sëmundjesh kronike, një llogaritje e tillë nuk do ti çonte shumë lart shifrat pasi ne kemi vetëm vdekshmërinë spitalore, pasi bota ka edhe ato nëpër shtëpi apo nëpër azile. Covidi te të sëmurët kronik thjesht ju ka shkurtuar kohën”, është shprehur mjeku Mezini.
