Kolegët e Arjan Salës kanë treguar momentet e fundit të 33-vjeçarit para se të futej në magazinën që kishte marrë flakë,ku edhe humbi jetën. Në emisionin “Opinion”, Armand Abazaj, koleg i tij ka thënë se Arjani ka arritur të nxjerrë jashtë shumë njerëz. Ai tregoi se e kishte thirrur disa herë në radio dhe në telefon, por ai nuk i ishte përgjigjur.
“Po konsumonim një cinge, erdhi një thirrje nga roja se kishte tym mbrapa. U nisëm për tek flakët dhe kërkuam informacione më shumë. U futëm brenda magazinës dhe kishte shumë tym. Unë u ktheva dhe shkova për të marrë bombolën e fikjes së zjarrit. Kam tentuar që të qëndroj brenda, pashë veten që isha shumë keq dhe kam dalë. Ishin shumë punëtorë që dolën jashtë. Arjani na bërtiste që të dilnim jashtë dhe ka nxjerr shumë njerëz jashtë. Pastaj e kam thirr ne radio, e kam marrë dhe në telefon dhe nuk më është përgjigjur”, tha Abazaj.
Ndërsa kolegu tjetër, Gentian Goga ka treguar se Arjani mori bombolën më të afërt dhe u fut brenda e më pas nuk e kanë parë më. Ai ka thënë se kishin raporte të mira dhe për çdo gjë Arjani ishte shumë i afërt.
“Ishte mbushur gjithë tym, ai ka marrë bombolën më të afërt dhe u fut brenda. Ka thënë ‘dilni, dilni, por nuk po e shihnim më. Kishim një raport shumë të mirë, ishim dhe moshatar dhe na shkonte muhabeti për çdo gjë ishte shumë i afërt”, ka thënë Goga.
