Sekretari i Përgjithshëm i Rithemelimit, Flamur Noka pas mblehdjes së grupit parlamentar është shprehur se sot opozita do jetë në dy betetja, edhe jashtë Kuvendit, por edhe brenda tij.
“Sot në orën 17:00 do shihni dy beteja, një betejë brenda në Parlament dhe një jashtë”, tha ai për mediat në përfundim të konsultimit të grupit parlamentar demokrat.
Sipas Nokës, në mbledhje u diskutua lidhur me deklaratat e Arben Ahmetajt dhe më pas edhe për situatën e agravuar brenda Kuvendit.
“Edi Rama me lëvizjet që bën dhe veprimet e tij në atë Parlament po kërkon të nënshtrojë opozitën dhe ta shkelë atë. Përjashtimi i vazhdueshëm i deputetëve, dhe kryesisht përjashtimi i 19 deputetëve në seancën e fundit, tregon qasjen armiqësore të Edi Ramës ndaj opozitës. Për këtë, ne thërrasim sot pasdite në orën 17;00, një protestë për parlamentin, për parlamentarizmin, për demokracinë, për pluralizmin, për drejtësinë që është kthyer në padrejtësi dhe për Shqipërinë.
Sot në protestë do jenë të gjithë demokratët, do të jenë të gjithë deputetët që janë të përjashtuar. Ne, që momentalisht nuk jemi akoma të përjashtuar, do jemi brenda duke zhvilluar beteja. Pra sot do shihni dy beteja sot, një betejë brenda në parlament dhe një jashtë”, nënvizoi Flamur Noka.
