Një vatër zjarri është shënuar pasditen e sotme në fshatin Zgërbonjë, Njësia Administrative Vërtop, në Poliçan të qarkut Berat.
Flakët kanë përparuar me shpejtësi në drejtim të një kodre me pisha, të ndihmuara nga era dhe temperaturat e larta.
Në terren ndërhynë dy mjete zjarrfikëse dhe shtatë efektivë nga Berati, të cilët, për shkak të terrenit të vështirë, nuk arritën të depërtonin me automjete deri në vatrën e zjarrit. Për pasojë, operacioni u zhvillua me mjete rrethanore dhe pompa uji shpine.
Pas përpjekjeve disaorëshe, zjarri është vënë nën kontroll. Megjithatë, forcat zjarrfikëse vijojnë monitorimin në terren për të shmangur rindezjen e flakëve.
