Lëvizja Vetëvendosje fitoi bindshëm zgjedhjet në Kosovë duke marrë thuajse 48% të votave. Partia e Albin Kurtit la pas çdo parti tjetër, duke marrë numrin më të lartë të votave që ndonjë parti ka marrë ndonjëherë në zgjedhjet e Kosovës. Ndërkohë, kanë ardhur edhe reagimet e para për fitoren e Kurtit nga politikanët shqiptarë. Kryetarja e LSI, Monika Kryemadhi ka uruar Kurtin dhe Vjosa Osmanin, duke qenë e hapur për bashkëpunim me qeverinë e re në Shqipëri
“Kosova dhe qytetarët e saj zhvilluan një proces zgjedhor shpresëdhënës këtë 14 shkurt, që edhe nën sfidën e pandemisë, u dominuan nga kultura demokratike për respektimin e vullnetit të sovranit.Urime Lëvizjes Vetëvendosje!, Albin Kurtit dhe Vjosa Osmanit për fitoren bindëse.Suksese parlamentit dhe qeverisë së re, me bindjen se do t’i japin një ritëm më të shpejtë zhvillimeve pozitive për forcimin e shtetit të Kosovës dhe integrimit të tij në arenën ndërkombëtare.Mirëpres mundësinë që me qeverisjen e re të Shqipërisë, të jemi krah për krah për bashkëpunim real dhe integrim në të gjitha planet me Kosovën, duke synuar një të ardhme më të mirë të qytetarëve tanë”- shkruan Kryemadhi.
Nuk ka munguar as urimi i kreut demokrat, Lulzim Basha i cili e ka quajtur procesin zgjedhor në Kosovë shembullor.
“Përgëzime nga zemra qytetarëve të Kosovës, institucioneve dhe partive politike për një proces zgjedhor shembullor me standarte europiane, model demokracie për mbarë rajonin.Do të jem i lumtur të bashkëpunoj ngushtësisht me qeverinë e re të Kosovës, si sa i përket proceseve të integrimit euroatlantik dhe vijimit të njohjeve ndërkombëtare, ashtu dhe për zhvillimin ekonomik të të dy vendeve tona.Urime VV, Albin Kurtit dhe Vjosa Osmanit për fitoren e zgjedhjeve. Kosova ka sfida të mëdha përpara. Jam i bindur se partia fituese e zgjedhjeve dhe partitë e tjera do të arrijnë ti adresojnë dhe zgjidhin ato në të mirë të qytetarëve të Kosovës,”- shkruan Basha.
Ndërkohë, asnjë reagim nuk ka psur ende kryeministrii vendit, Edi Rama i cili ka pasur debate në distancë shpesh me Albin Kurtin dhe Vjosa Osmanin, për s ai përket minishengenit ballkanik dhe dialogut të Kosovës me Serbinë.
