Një tjetër triumf i madh, kompletohet një seri tjetër e arritjeve historike për Novak Djokovic. Numri 1 i botës në tenis, mposhti Matteo Berrettini, me 6-7 (4), 6-4, 6-4, 6-3 në finalen e madhe të “Wimbledon”, për të fituar trofeun e 20-të në “Grand Slam”, një rekord i vendosur.
Djokovic barazoi rekordin e Roger Federer dhe Rafael Nadal me titujt kryesorë të gjitha kohërave, në garat teke për meshkuj. 34-vjeçari ka fituar tre fazat e para të “Grand Slam” 2021, duke fituar “Australian Open”, “Roland Garros” dhe “The Championships”.
Djokovic është tenisti i parë që triumfon në tre fazat e para të sezonit, që nga viti 1969 kur e bëri Rod Laver. Berrettini arriti të kalojë në epërsi 5-2 në setin e parë, por Djokovic rregulloi lojën e tij dhe tregoi qëndrueshmëri të madhe për të dalë fitimtar pas tre orësh dhe 23 minutash ndeshje. Në fund, serbi fitoi 3-1 me sete, duke përmbysur gjithçka dhe duke u shpallur fitues.
Numri 1 i botës është në një seri fitoresh në 21 ndeshje radhazi në fushë me bar. Ndryshe nga rivalët e tij, Federer dhe Nadal, Djokovic e ka bërë të qartë se ai dëshiron ta përfundojë karrierën e tij me numrin më të madh të “Grand Slam” të fituara. “Unë dua të shkruaj historinë”, u shpreh Djokovic pak javë më parë.
