Ibrahim Qerimi kishte fituar vendin e parë si shërbyesi më i mirë dhe më i shpejtë në vitin 1974.
Edhe pse kishte pjesëmarrës nga Serbia, Mali i Zi edhe nga Vojvodina, gazeta ‘Rilindja’ shkroi për suksesin e Qerimit në kohën e ish-Jugosllavisë.
Ndonëse ka mbushur të 70-tat, ai ende nuk i ka harruar mësimet që ka ndjekur në fushën e hotelerisë.
Ai u shpreh se serbët për inat nuk ia kishin dhënë çmimin e artë por i kishin dhënë vetëm diçka simbolike.
“Në Pejë kemi qenë tre kamariera nga Ferizaj. Kemi qenë rreth 60 apo 70 kamariera nga Serbia, Vojvodina e Mali i Zi, ne nga Kosova. Më ka rënë së paku tetë herë në kualifikime për garën e vendit të parë. Më në fund deshi fati që unë zura vendin e parë si kamerieri më i mirë në garën hoteliere në vitin 1974. Atë sukses e dokumentoj me fotografi nga Gazeta ‘Rilindja’.
Mua nuk më kanë dhënë çmimin sepse iu ka ardhur inati serbëve, më kanë dhënë diçka simbolike, por Çmimin e Artë nuk ma kanë dhënë.”- shprehet Ibrahim Qerimi për RTV Dukagjini.
Ibrahim Qerimi shprehet se ka pasur rastin t’i shërbejë udhëheqësit të ish-Jugosllavisë, Titos, dy herë.
Gjithashtu edhe shumë figurave të tjera politike si për shembull edhe ish-presidentit Ibrahim Rugova.
“Kam pasur rast si kamerier të shërbej edhe Titon në vitin 1974 në Hotel ‘Jugosllavia’. Kuptohet ai ishte me delegacionin e vet nga Kosova, Mahmut Bakalli, Fadil Hoxha etj. Pas lufte edhe kryetarit Ibrahim Rugova i kam shërbyer së paku dy herë. Pastaj edhe të gjithë tjerët, Thaçin e mos të flasim më për Ferizaj. Ka pasur rast që kamarieri kur e ka parë nga dritarja inspektorin ka ikur me vrap, sepse ka pasur frikë mos i ka thonjtë e pa prerë. Çdo gjashtë muaj është dashur të nxjerrim librezë sanitare.
Kemi shërbyer kafe, çaj etj., por jo pije alkoolike. Kemi qenë rreth 120 punëtorë e më pas ka shkuar deri në 180 punëtorë. Mund të them se gjatë viteve që kam punuar aty për 90% të atyre punëtorëve e kam ditur se çfarë pinë”,- tregon kamarieri që bëri famë në Jugosllavinë e vitit 1974.
https://www.facebook.com/tvdukagjiniofficial/videos/2022760401122580/?t=0
Ibrahim Qerimi e kujton me shumë nostalgji kohën e mbushur me sukses në fushën e hotelerisë dhe gjithashtu thotë se ka marrë pjesë edhe në gara të shahut ndonjëherë.
