Gjyqtarja e Krimeve të Rënda, Liljana Baku është dorëhequr nga detyra.
Ajo e depozitoi kërkesën në Këshillin e Lartë të Gjyqësorit më 2 dhjetor.
Në kërkesën e depozituar janë shpjeguar edhe arsyet e saj të largimit.
Mësohet se pas daljes nga sistemi i drejtësisë, Baku do të angazhohet në një biznes privat.
Kërkesa e saj pritet të shqyrtohet në seancën e datës 10 dhjetor, pak përpara se Këshilli të bëjë emërimin e përkohshëm të SPAK.
Baku do të emërohej automatikisht pranë SPAK, pasi kishte shprehur pëlqimin, që autoritetet të kontrollonin llogaritë bankare të saj dhe të familjarëve, si dhe komunikimet telefonike.
Liljana Baku është pjesë e sistemit të drejtësisë për më shumë se 20 vite.
Ajo ka punuar pranë Gjykatës së Krimeve të Rënda, ku një ndër dosjet më delikate që ka kaluar nëpër duar, është ajo e ish-ministrit të Brendshëm, Saimir Tahiri.
Baku pranoi kërkesën e Prokurorisë, për bllokimin e pasaportës së Tahirit, duke i ndaluar lëvizjen jashtë vendit.
Masa e saj u shfuqizua nga Gjykata e Apelit. Gjyqtarja firmosi edhe masën e dytë për Tahirin, atë të arrestit shtëpiak, e cila po ashtu u shfuqizua nga Apeli.
